Löiemüüli, 20. Mai
Der vorder Tag hei mer's vo de Lilie gha, dene edle Genosse i der Bluemewält. Chly weniger hoffärtig chunnt es angers Blüemli derhär, sy Name faht ou mit L a. Es isch ds Löiemüüli.
By däm Löiemüli handlet es sich um enes ganz bsungerigs Exemplar. Wieso das so isch zeigt sich im Hingergrund vo däm Bild:
Im Chübel gseh mer e früsch versetzti Tomatestude, Normalerwys blüje doch d Löiemüli ersch, wenn d Tomate de nahdisnah ryf wärde. Die Stude het im warme Chies vo üsem Husplatz möge überwintere und het jetz scho zmitts im Früehlig munter afa druf los blüje. Da staunt der Laie und der Fachmann wundert sich!
Vilecht heit Dir ja während dere Corona-Zyt ou ds einte und angere Wunder erläbt?